Dislokimi i trupave shtesë të KFOR-it mbi Urën e Ibrit ishte trajnim dhe jo alarmim, ashtu siç keqinformuan disa mediume në Kosovë dhe Shqipëri. Marrë parasysh interesimin e madh të publikut për zhvillimet rreth urës kryesore në Mitrovicë, të cilën Qeveria ka paralajmëruar ta hapë me gjithë kundërshtimin e fortë ndërkombëtar, media të ndryshme kanë publikuar informacione të paverifikuara.
Më 31 gusht 2024, Top-Channel ka shpërndarë një artikull me titull: “KFOR-i në alarm? Rrit praninë në Urën e Ibrit, çfarë dinë ndërkombëtarët!”.
Në përmbajtje të artikullit shkruan se pasi autoritetet e Kosovës mbyllën pesë komuna paralele serbe në veri të vendit, misioni paqeruajtës i NATO-s, KFOR-i, ka rritur praninë në urën kryesore mbi lumin Ibër. Mirëpo, nuk është ofruar ndonjë informatë shtesë në lidhje me pretendimin se KFOR-i mund të jetë në alarm, ashtu theksohet në titull. Në tekst as nuk tregohet se çfarë dinë ndërkombëtarët, ashtu siç pretendohet në titull.
Ndërsa artikulli me përmbajtje të njëjtë u shpërnda edhe nga Thuaje.com, Konica.al, Portali Fiks, Gazeta Tema.
Burimi i fotos: Top-Channel
Pas publikimit të lajmeve ka reaguar misioni i KFOR-it, duke treguar qëllimin pse ka rritur prezencën e trupave mbi urë.
Sipas tyre, mjetet shtesë, që i përkasin Njësisë së Specializuar Shumëkombëshe të tij, janë vendosur vetëm përkohësisht në urën kryesore mbi lumin Ibër në Mitrovicë.
“Dislokimet e tilla shtesë janë pjesë e trajnimit periodik që KFOR-i bën për t’i testuar procedurat e tij dhe për t’i ruajtur standardet më të larta operacionale”, kanë thënë nga KFOR-i. Më tej, kanë shtuar se për këtë trajnim ka qenë e njoftuar edhe Policia e Kosovës.
Që nga përfundimi i luftës, KOFR-i është prezent mbi Urën e Ibrit, e cila është e qarkullueshme vetëm për këmbësorë, megjithëqë punimet për rivitalizimin e saj për qarkullim të automjeteve kanë përfunduar prej vitesh. Derisa KFOR-i rikonfirmoi prezencën mbi urë, BE-ja dhe QUINT-i i kanë kërkuar Qeverisë që të mos e hapë tash urën për vetura. Në KFOR e kanë përsëritur këtë thirrje tek kanë shtuar se çështjet e hapura duhet të trajtohen në Dialogun e Brukselit.
“Ne besojmë se vetëm veprimet e KFOR-it mund të garantojnë paqe dhe siguri në zonat serbe në veri të Kosovës, si dhe të ofrojnë hapësirë për një dialog politik nën ndërmjetësimin e Bashkimit Europian, i cili do t’i zgjidhte të gjitha çështjet e hapura në procesin e normalizimit të marrëdhënieve.”
Një ditë para dislokimit të trupave të KFOR-it mbi Urën e Ibrit, autoritetet e Kosovës mbyllën pesë objekte paralele serbe në veri të Kosovës, për të cilat autoritetet thanë se funksiononin me direktiva të Serbisë. Por, edhe ky aksion u dënua gjerësisht nga ndërkombëtarët, duke u cilësuar si veprim i njëanshëm i Qeverisë.
Në BE thanë se janë të “zhgënjyer” nga mungesa e vazhdueshme e koordinimit të Kosovës me partnerët ndërkombëtarë dhe ata të sigurisë. Edhe NATO-ja shprehu zhgënjim përmes zëdhënëses Farah Dakhlallah, e cila deklaroi se aksionet nuk ishin të koordinuara, “pavarësisht nga premtimet të përsëritura se do të bëhej një gjë e tillë”.
Në situata të tensionuara, siç është ajo që lidhet me rritjen e prezencës së KFOR-it mbi Urën e Ibrit, është thelbësore që media të verifikojë informacionet para se t’i publikojë ato. Keqinformimi mund të shkaktojë panik të panevojshëm, të përshkallëzojë tensionet dhe të ndikojë në perceptimin e publikut për situatën.
*Ky artikull publikohet në kuadër të Iniciativës Rajonale të Ballkanit Perëndimor kundër dezinformimit. “Qendra kundër dezinformatave në Ballkanin Perëndimor: ekspozimi i ndikimeve keqdashëse përmes gazetarisë mbikëqyrëse.”
