“NTV.al” ka pretenduar pa fakte se Bashkimi Europian (BE) po e sulmon Kosovën me raketa. Më 21 nëntor 2024, në një postim në Facebook, portali nga Shqipëria që ka shtrirje edhe në Kosovë, “NTV.al”, ka publikuar një video me titullin: “Senatori amerikan ngre alarmin / Rusia dhe Serbia, gati për kaos”. Në video është edhe një artikull ku shkruan se “BE ’sulmon‘ Kosovën me raketa”. Përmbajtja e videos flet vetëm për kërkesat e BE-së ndaj Kosovës rreth dialogut me Serbinë, dhe nuk e mbështet pretendimin në titull. Duke mos ofruar të dhëna që mbështesin pretendimin në titull, artikujt e tillë kategorizohen si “clickbait” me përmbajtje keqinformuese, ku qëllimi është marrja e klikimeve dhe shkaktimi i hutisë te lexuesit/shikuesit.
Krejt çka jepet në video është deklarata e BE-së, që thotë se Qeveria e Kosovës nuk mund të hartojë statutin e Asociacionit të Komunave me Shumicë Serbe jashtë dialogut të Brukselit dhe që, sipas tyre, çdo propozim duhet të diskutohet me Serbinë, ndërmjetësuesin e BE-së, si dhe të jetë në përputhje me marrëveshjen e vitit 2013 dhe atë të vitit 2015. Në vazhdim të videos paraqitet edhe një pjesë e deklaratës së zëdhënësit të Bashkimit Europian, Peter Stano, i cili ka thënë se kryeministri Albin Kurti duhet të ecë përpara në zbatimin e Marrëveshjes Bazë të Brukselit dhe Aneksit të Ohrit, të arritur në vitin 2023, rrjedhimisht edhe të nisë hapat për themelimin e Asociacionit.
Mirëpo, në këtë lajm nuk janë ofruar të dhëna të tjera, të cilat mbështesin pretendimin në titull.
Lajmi u dha në të njëjtën ditë kur Ukraina njoftoi se Rusia lëshoi një raketë balistike ndërkontinentale gjatë natës, duke shënjestruar qytetin Dnipro në pjesën qendrore-lindore të vendit.
Kjo nuk është hera e parë që ky portal online keqinformon për zhvillimet në Kosovë.
*Ky artikull publikohet në kuadër të Iniciativës Rajonale të Ballkanit Perëndimor kundër dezinformimit. “Qendra kundër dezinformatave në Ballkanin Perëndimor: ekspozimi i ndikimeve keqdashëse përmes gazetarisë mbikëqyrëse.”
