Fitim Gashi, Udhëheqës i Projektit kundër Dezinformimit në Sbunker, mori pjesë si panelist me rastin e shfaqjes së premierës të dokumentarit “In Pursuit of Truth” në konferencën e-Society, të mbajtur më 10–11 dhjetor në Shkup, me temën “Integriteti në qendër të transformimit digjital”. Dokumentari është publikuar në kuadër të Western Balkans Anti-Disinformation Hub, me mbështetjen e Ministrisë së Punëve të Jashtme të Mbretërisë së Holandës.
Shfaqjes së dokumentarit i parapriu një diskutim me anëtarët e Rrjetit Kundër Dezinformimit.
Fitim Gashi theksoi se: “me rritjen e shpejtë të mediave online është përshpejtuar dhe sofistikuar përhapja e dezinformatave. Informatat e rrejshme nuk përbëjnë vetëm sfidë mediale — në rastin e Kosovës është dëshmuar se ato përbëjnë kërcënim për sigurinë e janë pengesë në realizimin e objektivave strategjike”.
“Rajoni mbetet i cenueshëm ndaj manipulimit të informacionit, prandaj bashkëpunimi dhe rrjetëzimi rajonal është thelbësor”, shtoi ai.
E-Society Conference
Konferenca e këtij viti mblodhi së bashku profesionistë të njohur në fushën e sigurisë kibernetike, inteligjencës artificiale, gazetarisë, verifikimit të fakteve dhe parandalimit të dezinformimit. Përmes diskutimeve, punëtorive, ligjëratave dhe aktiviteteve interaktive, pjesëmarrësit shtjelluan mënyra për të mbrojtur integritetin gjatë procesit të transformimit digjital.
