Sot Sbunkeri mbajti aktivitetin e parë në kuadër të projektit “Luftimi i ekstremizmit në Kosovë: Tendencat, Sfidat, dhe Kundër-veprimet”, i përkrahur nga Ambasada e Mbretërisë së Holandës në Kosovë. Qëllimi i këtij aktiviteti të parë ishte prezantimi i projektit para institucioneve publike, organizatave të shoqërisë civile, donatorëve e organizatave ndërkombëtare prezentë në Kosovë, dhe njoftimi me punën e shkëmbimin e përvojave dhe perspektivave të ndërsjella.
Qëllimi i projektit është identifikimi i prirjeve dhe ideologjive ekstremiste dhe roli i ndikimit të huaj malinj; angazhimi me komunitetet lokale dhe ata që gjenden në vijat e para të ballafaqimit me këto dukuri; dhe përfshirja me politikëbërësit për të rritur ndërgjegjësimin dhe avokimin për ndryshime politikash institucionale e legjislative.
Projekti do të punojë me të rinj, gra, komunitete joshumicë dhe ata që janë më të ekspozuar ndaj rrezikut të instrumentalizimit nga grupet ekstreme dhe radikale, me qëllim vetëdijesimin dhe parandalimin e hershëm të ekstremizmit, dhe kufizimin e ndikimit të tij.
Pjesëmarrës ishin pjesëtarë institucionesh si Policia e Kosovës, Forca e Sigurisë së Kosovës, Komuna e Prishtinës, përfaqësues të organizatave joqeveritare si QKSS, ATRC, CDF, Forum ZFD Civil Peace Service – Kosovo, Syri i Vizionit, KEC, përfaqësues të ambasadave e organizatave ndërkombëtare, si Ambasada e ShBA-ve, Zyra e BE-së në Kosovë, G-CERF, e të tjerë.
Shprehim mirënjohjen tonë për Ambasadën e Mbretërisë së Holandës në Kosovë për përkrahjen e këtij projekti përmes programit Matra dhe e falënderojmë ambasadoren H.E. Carin Lobbezoo për pjesëmarrjen dhe fjalën e saj sot në takim.
