Në fillim të janarit 2023, faqe në “Facebook” dhe media të ndryshme shqiptare kanë shkruar mbi gjoja vdekjen e aktorit të njohur shqiptar, Mirush Kabashi.
Mirëpo, lajmin e ka demantuar vet Mirush Kabashi, duke thënë se vazhdon të përsëritet lajmi i rrejshëm për vdekjen e tij. Kjo është hera e dytë që mediet raportojnë për vdekjen e Kabashit, pa e konfirmuar paraprakisht.
“Unë jam gjallë, mos u shqetësoni, të paktën këtë shqetësim ia hiqni njerëzve, demantojeni një lajm i cili po përsëritet, që është i rremë, si duket ka efekte”, ka thënë Kabashi.
Pas reagimit të aktorit, disa media online e kanë fshirë postimin e tyre, por megjithatë lajmi vazhdon të jetë i qashshëm në medie të tjera.
E platforma të tjera duke tentuar kinse ta demaskojnë lajmin kanë përfituar klikime, duke manipuluar me tituj. Kësisoj, faqja në Facebook “Kosova Shqiptar”, në llogarinë e “Facebookut” ka publikuar lajmin me titull: “Vdes ikona Mirush Kabashi në moshën 73 vjeçare”.
Por kur klikon në lajm të kalon në faqen tjetër, “atraktivinfo.altervista.org”, i cili mban titullin- “Lajmi për vdekjen e Mirush Kabashit ishte i rrejshëm turp për ata që dezinformojnë”. Ndërsa, në përmbajtje është vetëm pjesa ku i urohet shëndet aktorit, pa shtjellim të dezinformatës.
Dezinformata që vazhdon të përsëritet nëpër media tjera online ka nxitur reagime të tjera.
“Më herët u publikua lajmi për vdekjen e aktorit Mirush Kabashi, ndërsa vajza e tij i mohoi këto lajme duke thënë se babai i saj është mirë me shëndetin. Më e keqja që nuk është hera e parë që publikohen lajme të tilla për Kabashin”, thuhet në njërin prej reagimeve në “Facebook”.
Reagimit i janë bashkëngjitur edhe fotografi të disa prej faqeve në “Facebook” që kanë raportuar rrejshëm për vdekjen e tij.
“Kokën lart Mirush Kabashi se pluhun i madh po çohet mbrapa madhështisë sate! Edhe gjatë do t’jetosh”, është një tjetër reagim.
Në fillim të muajit qershor 2021 kishte ndodhur e njëjta gjë, ku disa prej mediave raportuan mbi kinse vdekjen e Mirush Kabashit, por që pastaj i fshinë lajmet.
* Ky artikull publikohet në kuadër të Iniciativës Rajonale të Ballkanit Perëndimor kundër dezinformimit. “Qendra kundër dezinformatave në Ballkanin Perëndimor: ekspozimi i ndikimeve keqdashëse përmes gazetarisë mbikëqyrëse.”
