Sbunker-i ka publikuar raportin e ri tremujor në kuadër të Programit Disinfo, i cili paraqet gjetjet kryesore nga monitorimi i mjedisit informativ në Kosovë gjatë periudhës prill–qershor 2026.
Sipas raportit, hapësira informative u karakterizua nga intensifikimi i narrativave dezinformuese të lidhura me krizën politike, zgjedhjet e jashtëzakonshme parlamentare, çështjet e sigurisë dhe zhvillimet gjeopolitike. Paqartësitë institucionale dhe fushata zgjedhore u shfrytëzuan për përhapjen e sondazheve të fabrikuara, përmbajtjeve të nxjerra jashtë kontekstit dhe pretendime të pabazuara që synonin të ndikonin në perceptimin e votuesve.
Një nga prirjet më shqetësuese ishte rritja e përdorimit të përmbajtjeve të gjeneruara me Inteligjencë Artificiale. Gjatë monitorimit u identifikuan fotografi, video dhe materiale të manipuluara që paraqisnin si reale deklarata ose ngjarje të fabrikuara. Këto forma të reja të manipulimit e bëjnë gjithnjë e më të vështirë dallimin ndërmjet përmbajtjes origjinale dhe asaj të rreme.
Raporti trajton gjithashtu narrativat që e paraqisnin bashkëpunimin e Kosovës me NATO-n si përgatitje për konflikte të reja, pretendimet e pabazuara rreth ndryshimeve në Ligjin për Shtetësinë, si dhe instrumentalizimin e temave historike për nxitjen e polarizimit dhe mosbesimit ndaj institucioneve.
Krahas dezinformatave politike dhe gjeopolitike, gjatë kësaj periudhe vazhduan edhe mashtrimet digjitale përmes SMS-ve dhe skemave të phishing-ut, të cilat synonin vjedhjen e të dhënave personale dhe financiare të qytetarëve.
Gjetjet tregojnë se dezinformimi në Kosovë po bëhet gjithnjë e më kompleks, duke kombinuar propagandën politike, manipulimin vizual, teknologjitë gjenerative dhe mashtrimet digjitale. Në këtë kontekst, forcimi i verifikimit të fakteve, edukimit medial dhe aftësive për identifikimin e hershëm të përmbajtjeve të gjeneruara me Inteligjencë Artificiale mbeten thelbësore për mbrojtjen e integritetit të informacionit.
Raporti i plotë: Monitorimi i Dezinformimit (ALB)
Author
