Dezinformatat dhe lajmet e rreme lidhur me gjoja të plagosurit dhe dëmet e shkaktuara si pasojë e bllokimit të rrugëve që shpiejnë drejt pikave kufitare në Jarinje e Bërnjak, kanë qarkulluar këtë javë në mediat kosovare.
Më 31 korrik rreth orës 20:00, “Gazeta Nacionale” duke u bazuar, siç kanë thënë, në burime pranë vendit të ngjarjes, ka publikuar lajmin me titull: “Një polic e dy serbë të plagosur nga gjuajtjet me armë zjarri mes policisë dhe barrikaduesve”.
Sipas këtij raportimi, në pjesën veriore e cila të dielën u bllokua nga serbët janë plagosur një polic dhe dy qytetarë nga gjuajtjet me armë zjarri mes policisë dhe barrikaduesve. Lajmi i “Gazetës Nacionale” është ripublikuar edhe nga disa media tjera, por të cilët më pas e kanë tërhequr, si: Gazeta Newborn, Insajderi, Jepize, Sinjali, Veriu.info.
Pa kaluar një orë, ky lajm është demantuar nga Policia e Kosovës (PK) përmes një komunikate për media. Aty thuhet se PK-ja ka siguruar informacione zyrtare se në disa lokacione janë dëgjuar të shtëna me armë zjarri në drejtim të njësiteve policore, por se nuk ka pasur të plagosur.
Me këtë rast, PK-ja u ka bërë thirrje të gjitha mediave dhe qytetarëve që të mos bien pre e lajmeve të rrejshme, të cilat kanë tendencë destabilizimin e situatës dhe shkaktimin e panikut.
Edhe vetë Facebook, lajmin e publikuar për plagosjen e policit dhe qytetarëve e ka cilësuar si të rrejshëm.
Për pasojë “Gazeta Nacionale” është detyruar ta fshijë lajmin, kurse pronari i saj Berat Buzhala, kërkoi falje duke thënë se shkrimin e kanë bazuar në ‘një burim nga policia’ prej të cilit në të kaluarën kanë marrë informacione të sakta.
Një ditë pas zhvillimeve në veri, kryeministri Kurti dhe ministri i MPB-së Sveçla mbajtën një konferencë për media. Derisa Kurti tha se “fatmirësisht, nuk ka të plagosur me armë zjarri, siç u lajmërua rrejshëm nga ndonjë portal”, Sveçla konfirmoi se 11 qytetarë janë lënduar në forma tjera.
Edhe PK-ja ka njoftuar se ka pasur raste të ‘ndalimit dhe maltretimit’ të qytetarëve shqiptarë, duke iu shkaktuar lëndime dhe dëme materiale në automjetet e tyre nga persona të dyshuar si organizatorë të bllokimit të rrugëve.
Zyrtarët qeveritarë kanë përmendur brengën e faktorëve evropianë dhe amerikanë për efektin negativ të fushatës së dezinformimit të Serbisë mbi dy vendimet e 29 qershorit, teksa kanë arsyetuar shtyrjen e zbatimit të tyre për një muaj. Pas shtyrjes së afatit për zbatimin e vendimit barrikaduesit i larguan pengesat dhe pikat kufitare në Jarinjë e Bërnjak u rihapënpër qarkullim të lirë të njerëzve dhe mallrave.
Megjithëse u kërkua shtyrja e zbatimit, vendimin e qeverisë e mbështeti SHBA-ja. Ambasadori amerikan Jeffrey Hovenier ia kujtoi edhe kryetarit të Listës Serbe Goran Rakiqit, njëherësh ministër për Komunitete dhe Kthim, se këto masa bazohen në marrëveshjet e nënshkruara në Bruksel mes Kosovës dhe Serbisë. Vendimet e qeverisë i cilësoi si legjitime edhe Ambasadori i Gjermanisë, Jorn Rohde, në takim me presidenten Vjosa Osmani.
Ndërkohë Brukseli u është rikthyer përpjekjeve për gjetjen e një zgjidhjeje finale e cila do t’i shmangte bllokadat në veri, pas skadimit të afatit për zbatimin e reciprocitetit. Kësisoj, kryeministri Kurti dhe presidenti serb, Vuçiq i janë përgjigjur pozitivisht ftesës së Përfaqësuesit të Lartë të BE-së, Joseph Borrell, për t’u takuar në Bruksel më 18 gusht.
* Ky artikull publikohet në kuadër të Iniciativës Rajonale të Ballkanit Perëndimor kundër dezinformimit. “Qendra kundër dezinformatave në Ballkanin Perëndimor: ekspozimi i ndikimeve keqdashëse përmes gazetarisë mbikëqyrëse.”
