Prej seksizmit te “Dosja e shefave” dhe prapë te seksizmi

Reagimi jem i parë në lidhje me këtë modën që mundemi me e quejtë amplifikim i predikimeve fetare në media dhe në portale ‘mainstream’ ishte të kem parasysh se misongjinia, paragjykimi dhe diskriminimi ma i madh i grave në shoqninë tonë ushtrohet në institucionet publike laike, qysh prej shkollës e deri te ato politike. Po kështu, përgjegjësia për to i bjen edhe shoqnizimit gjinor në familje që asht themeli i marrëdhanieve të pabarabarta gjinore në shoqni.

Nëse përgjegjësia e këtyne institucioneve ndaj grues dhe faji për pozitën e pavolitshme të saj në shoqni janë pakrahasimisht ma të mëdha se sa do fetva të nji hoxhe që i përgjigjet pytjeve të xhematit të tij, mendova se kundërshtimi i sinqertë i seksizmit duhet me shënjue, së pari dhe ma së shumti, këto institucione.

Tash që doli skandali i “Dosjes së shefave” dhe e lanë nën hije skandalin e seksizmit të predikuesve fetarë, m’vjen nji shtysë për me iu kthye problemit të trajtimit të grues. E keni vërejtë qysh “interesat e ngutshëm” herë kombëtarë e herë shtetnorë, lanë nën hije “problemet e grues” në shoqni? Grueja injorohet, thua se “problemet e saj” nuk qenkan probleme të shtetit! Mirëpo, kjo traditë e lanies së “problemeve të grues” nën hijen e çashtjeve “ma urgjente” e ma “të randësishme” qofshin ato “shtetnore” a “kombëtare” në shoqninë tonë të udhëhequn prej burrave nuk është e re.

Edhe nëse ky skandal i “Dosjes së shefave” kishte me rezultue në diçka, kjo nuk ka me i zgjidhë problemet e seksizmit dhe diskriminimit të grave. Ato kanë me mbetë, pavarësisht se cilat burra e udhëheqin politikën. Prandej, për to duhet me folë në vazhdimësi e pa u ndalë për hir të ndonji çashtjeje “ma të madhe” shtetnore a kushedi se çfarë. Qysh me e justifikue shtetin që gjysmën e qytetarëve të vet i trajton si të rendit të dytë?!