Më 18 dhjetor, në Gjilan, u mbajt punëtoria e radhës me temë “Paralajmërimi i Hershëm dhe Veprimi i Hershëm Kundër Ideologjive Ekstremiste”, organizuar në kuadër të projektit “Luftimi i Ekstremizmit në Kosovë: Prirjet, Sfidat dhe Kundër-Masat”, i mbështetur nga programi Matra i Ambasadës së Holandës në Kosovë.
Punëtoria mblodhi një grup të larmishëm pjesëmarrësish nga komuna e Gjilanit, Kamenices, Vitisë dhe Ferizajit, duke përfshirë drejtorë të shkollave dhe të qendrave të punës sociale, nënkryetarë të komunave, përfaqësues fetarë, anëtarë të Policisë së Kosovës dhe ekspertë nga fusha të ndryshme sociale.
Hulumtuesja Adelina Hasani e udhëhoqi këtë punëtori, duke inkurajuar pjesëmarrësit të ndanin përvoja dhe të diskutonin në mënyrë bashkëpunuese për identifikimin e narrativave ekstremiste në komunitet, si ato fetare, etnonacionaliste dhe antigjinore. Diskutimet u fokusuan gjithashtu në krijimin e mekanizmave të mundshëm efektivë për të luftuar dhe parandaluar ekstremizmin në faza të hershme.
Gjatë punëtorisë, pjesëmarrësit shkëmbyen përvojat e tyre nga puna në terren dhe u angazhuan në punë grupore, ku formuluan rekomandime konkrete për parandalimin e ekstremizmit. Angazhimi dhe interaktiviteti i lartë nga pjesëmarrësit e bëri këtë punëtori një hap të rëndësishëm drejt ndërgjegjësimit komunitar dhe forcimit të bashkëpunimit ndërinstitucional.
