Përgatiti: Arjeta Krasniqi
Një anketë që po qarkullon në rrjete sociale me mbishkrimin “Sondazhi i ditës – Prishtinë” nga faqja “LDK – Mbretëri e Bashkuar” , pretendon se Lidhja Demokratike prin me 40% të mbështetjes qytetare, e ndjekur nga Lëvizja Vetëvendosje me 30 %, Partia Demokratike me 26 % dhe Aleanca për Ardhmërinë e Kosovës me 4%. Mbështetur në analizë, përmbajtja dhe sondazhi janë të rreme. Grafikoni i shpërndarë në rrjetet sociale në qendër e ka një fotografi të Lumir Abdixhikut dhe Vjosa Osmani me titull: “LDK del fituese”!
Në përmbajtjen e publikuar mungojnë elementet bazike që e bëjnë një sondazh të besueshëm dhe profesional. Nuk dihet kush e ka realizuar anketën, sa persona janë intervistuar, çfarë metodologjie është përdorur, në cilën datë është realizuar saktësisht dhe nëse rezultatet janë publikuar nga ndonjë kompani apo platformë tjetër kredibile.
Në grafikën e publikuar thuhet se sondazhi është realizuar “nga sheshi i Prishtinës” dhe “nga dhjetëra qytetarë të anketuar”, pa dhënë asnjë informacion shtesë. Një sondazh serioz duhet të përmbajë të dhëna të detajuara metodologjike, të cilat përfshijnë:
- numrin e respondentëve,
- mënyrën e përzgjedhjes së mostrës,
- periudhën e realizimit,
- margjinën e përgjigjes,
- institucionin që e ka realizuar,
- si dhe mënyrën e financimit të sondazhit.
Pa këto elemente, një publikim i tillë nuk mund të konsiderohet sondazh i besueshëm, por vetëm një grafikon i pa verifikuar që përdoret për ndikim politik apo propagandë për një subjekt të caktuar gjatë periudhës parazgjedhore.
Elementi tjetër që nuk është qëndron është pretendimi për përqindje të larta, ndonëse nuk jepet asnjë bazë statistikore mbi të cilën janë nxjerrë këto rezultate. Vetë përshkrimi “dhjetëra qytetarë të anketuar” nënkupton një numër shumë të vogël pjesëmarrësish, i pamjaftueshëm për të përfaqësuar opinionin e qytetarëve të Prishtinës. Po ashtu këto rezultate nuk jepen edhe në ndonjë platformë apo faqe zyrtare. Postimi në fjalë ka marrë një numër të konsiderueshëm reagimesh prej 1 mijë e 400 pëlqime, 796 komente dhe 12 shpërndarje, duke ndikuar në përhapjen më të madhe të informacionit të paverifikuar tek publiku. Ndërkohë, të dhënat mbi faqen tregojnë se mungon transparenca lidhur me menaxhimin e saj, periudhën e krijimit dhe identitetin e personave që e administrojnë atë. Përmbajtja e publikuar në këtë faqe kryesisht përqendrohet në tema politike dhe përkrahje të LDK-së, sondazhe dhe postime me karakter sensacional.
Për krahasim, rezultatet zyrtare të zgjedhjeve të fundit parlamentare në Kosovë tregojnë një pasqayrë tjetër politike nga ajo që pretendohet në këtë grafik. Sipas rezultateve zyrtare të Komisionit Qendror të Zgjedhjeve (KQZ), në zgjedhjet e parakohshme parlamentare të mbajtura në dhjetor 2025, Lëvizja Vetëvendosje kishte dalë e para me mbi 51.10 % të votave në nivel vendi, ndërsa LDK e treta me 13.24 % te votave.
Publikime të tilla pa burime zakonisht shfaqen në prag të proceseve zgjedhore, kryesisht në rrjete sociale, me qëllim të ndikimit në orientimin e votuesve në ditën e zgjedhjeve. Mungesa e transparencës dhe të dhënave verifikuese i bën këto “sondazhe” të pabesueshme dhe jo profesionale.
Në kohë zgjedhjesh, është e rëndësishme që lexuesit ta verifikojnë burimin e një sondazhi, metodologjinë dhe institucionin që qëndron pas tij, para se t’i konsiderojnë rezultatet si reale apo të besueshme.
Author
