Sbunker-i u lansua më 2016 si hapësirë idesh dhe mendimi kritik, duke ofruar përmbajtje që i jep përparësi cilësisë e jo urgjencës së lajmit. Me kalimin e viteve, Sbunker-i u rrit në një platformë më të gjerë mediatike, duke zhvilluar produkte dhe formate të reja që iu përgjigjën nevojave të kohës. Përveç publikimit të teksteve analitike dhe eseve, Sbunker-i zhvilloi përmbajtje multimediale, organizoi trajnime, mbajti konferenca vendore e rajonale, si dhe ndërtoi bashkëpunime me autorë, studiues dhe organizata të ndryshme.
Sbunker-i filloi të menaxhojë projekte në fushën e dezinformimit. Sbunker-i trajton në mënyrë sistematike të gjitha format e dezinformimit përmes publikimit të artikujve demaskues, analizave të thella, si dhe përpilon raporte që trajtojnë rrjedhën e informatave të rrejshme nga akterë dashakeqës që e kanë cak Kosovën dhe rajonin e Ballkanit Perëndimor.
Përmbajtjet e publikuara ndër vite kanë sfiduar narrativa dominuese, kanë hapur tema të neglizhuara, si dhe kanë nxitur lexuesit të mos e pranojnë realitetin politik e shoqëror ashtu siç u shërbehet.
Për shumë lexues, studentë, aktivistë dhe gazetarë, Sbunker-i ka shërbyer si pikë reference për mendim kritik dhe si dëshmi se media mund të ketë rol emancipues në shoqëri. Në këtë dhjetëvjetor, falënderimi shkon për të gjithë ata që kanë qenë pjesë e Sbunker-it, nisur nga themeluesit, stafi, bashkëpunëtorët, si dhe donatorët që na kanë mbështetur në këtë rrugëtim 10-vjeçar. Ju faleminderit të gjithëve!
