Më 21 dhe 22 tetor u mbajtën dy punëtori interaktive në Mitrovicën e Veriut, në kuadër të projektit “Rinia Kosovare e Bashkuar Kundër Radikalizmit”. Këto punëtori, që u udhëhoqën nga Sabina Kaqinari përbashkuan të rinjtë e komuniteteve të ndryshme për të shqyrtuar disa çështje me rëndësi për ta.
Punëtoria e parë u përqendrua në tema si vlerat e brendshme, identiteti, modeli i ajsbergut kulturor, dinamikat e konflikteve dhe rolet gjinore. Qendrore në këtë punëtori ishte diskutimi mbi hapësirat e sigurta, ku pjesëmarrësit ndanë perceptimet e tyre personale mbi atë se ç’do të thotë një hapësirë e sigurtë për ta. Ky dialog interaktiv i dha mundësi secilit që të përfshihet lirshëm në diskutim, duke e bërë vetë punëtorinë një hapësirë të sigurt për shkëmbim mendimesh.
Punëtoria e dytë u përqendrua në diskutimet rreth ndërtimit të paqes, duke filluar me rëndësinë kyçe të shëndetit mendor dhe emocional në zgjidhjen e konflikteve. Duke vazhduar me analizën e rolit të negociatave të paqes, u theksua nevoja për përfshirjen e të gjitha palëve të përfshira, sidomos atyre që përballen me sfida specifike në situata konfliktuale. Diskutimi u thellua sidomos në ndikimin e roleve gjinore përjetimet dhe zgjidhjet e konflikteve, duke vënë theksin te nevoja për qasje gjithëpërfshirëse dhe empatike në adresimin e shkaktarëve të konflikteve dhe ndërtimin e një paqeje të qendrushme.
Të dy punëtoritë ishin të strukturuara në mënyrë interaktive, duke inkurajuar pjesëmarrësit që të angazhohen aktivisht në diskutime dhe ushtrime praktike. Ky angazhim i lartë nga pjesëmarrësit tregon interesimin e madh e të rinjve kosovarë për këto tema si dhe dëshirën e tyre për të sfiduar dhe eksploruar ide të reja. Ky angazhim është një tregues i fuqishëm për potencialin e tyre në ndërtimin e një ambienti më të mirë për dialog dhe bashkëpunim në komunitet.
Ky projekt përkrahet nga YIHR-KS financuar nga USAID Kosovo, dhe implementohet nga Sbunker në bashkëpunim me Alternativna.
