*Përgatiti: Ridona Berisha
Me 29 gusht 2023, mediumi publik RTKlive.com, ka publikuar një artikull me titull ”The Economist“: Kosova me rritje ekonomike, tejkaloi fqinjët ballkanikë”.
Ky artikull u publikua edhe nga portale të tjera si: Indeksonline, RadioGjilani, Insajder, Mesazhi.com, lideri.mk, etj. Po ashtu pati shumë shpërndarje në rrjetet sociale nga zyrtarë të partisë në pushtet dhe mbështetës të tyre, duke e cilësuar si arritje të madhe faktin se një medium prestigjioz po e konfirmon atë që e kanë thënë në vazhdimësi se, Kosova ka rritjen më të madhe ekonomike në rajon.
Por ky nuk ka qenë hulumtim i revistës “The Economist”, por një artikull i sponosorizuar nga Oda Ekonomike e Kosovës (OEK), me qëllim të promovimit të bizneseve kosovare.
Në webfaqen zyrtare të “Economist Impact”, shpjegohet në krye të artikullit se ai nuk është shkruar nga stafi i ‘The Economist’. “Vendosje të tilla etiketohen qartë si veçori e reklamimit, reklamim, përmbajtje e sponsorizuar, këndvështrim i sponsorizuesit ose fjalë në këtë kuptim kudo që publikohen në faqen tonë të internetit ose aplikacionet tona. As ekipi i lajmeve dhe editorialeve të ‘The Economist’, as ekspertët e pavarur të ‘Economist Impact’, nuk kanë ndonjë përfshirje në krijimin e kësaj përmbajtjeje”, shkruan tek pjesa e informacionit.
Pas reagimeve të shumta, lajmi është edituar nga RTK-ja duke e futur përshkrimin si artikull i sponsorizuar.
Reagime të ndryshme ka pasur edhe në rrjete sociale. Ish drejtori i OEK-ut, Berat Rukiqi, ka sqaruar se promovimi në “The Economist, është rezultat i një Memorandumi të nenshkruar, nga Oda Ekonomike e Kosovës, Oda Ekonomike Amerikane në Kosovë, Klubi i Prodhuesve të Kosovës dhs Projekti i USAID, Kosovo Compete, në Dhjetor të vitit 2021”, ndërsa ka shtuar se “Qeveria e Republikës së Kosovës nuk ka pranuar të paguaj asnjë cent për këtë promovim”.
*Ky artikull publikohet në kuadër të Iniciativës Rajonale të Ballkanit Perëndimor kundër dezinformimit. “Qendra kundër dezinformatave në Ballkanin Perëndimor: ekspozimi i ndikimeve keqdashëse përmes gazetarisë mbikëqyrëse.”
