*Përgatiti: Ridona Berisha
Më 12 nëntor 2023, Kombëtarja e Kosovës në futboll luajti kundër Izraelit në kuadër të kualifikimeve për Euro 2024. Ndeshja u zhvillua nën masa të rrepta të sigurisë, si rezultat i eskalimit të konfliktit Palestinë-Izrael.
Përveç situatës së tensionuar të sigurisë, pati edhe dezinformata të shumta lidhur me aspektin e sigurisë.
Konflikti Palestinë-Izrael po shfrytëzohet edhe nga media e individë të tjerë për shpërndarje të informacioneve që nuk mbështeten në burime dhe dokumente të besueshme. Kësisoj, pati tendenca që të shkaktohet frikë dhe panik në opinion.
Drejtori i Institutit ‘Octopus’, Agim Musliu, publikoi në Platformën X një pretendim kinse Serbia kishte planifikuar ta shfrytëzojë ndeshjen në Prishtinë për të shkaktuar incident.
“Plani i Serbisë për të shkaktuar një incident ndërkombëtar në Prishtinë, në ndeshjen e futbollit ndërmjet Kosovës dhe Izraelit, dështoi. Aleksandar Vuçiq donte të përdorte luftën në Gaza për ta bërë Kosovën armiqësore me perëndimin”, ka shkruar Musliu.
Foto: Pjesë e shkëputur nga postimi i Agim Musliu në platformën X.
Postimit ia ka bashkëngjitur edhe një fotografi të manipuluar, në të cilën shihet presidenti i Serbisë, Aleksandar Vuçiq, teksa shikon kah stadiumi “Fadil Vokrri” dhe në duar mban një letër me mbishkrimin: “Operacioni special, ndeshja Kosovë–Izrael”.
Pretendimi i Musliut u shpërnda pa u verifikuar nga disa portale në gjuhën shqipe, si: Bota Sot, Gazeta Blic, Kosova ime, Rruga Press, Kosova.info, Jepi zë, Ballkani.info, Gazeta Infokus, etj. Por, autoritetet vendore që shtuan kontrollet e sigurisë para, gjatë dhe pas ndeshjes, në asnjë moment nuk kanë deklaruar se ka ekzistuar ndonjë plan që të shkaktohet incident në stadiumin e kryeqytetit, siç pretendoi Musliu.
*Ky artikull publikohet në kuadër të Iniciativës Rajonale të Ballkanit Perëndimor kundër dezinformimit. “Qendra kundër dezinformatave në Ballkanin Perëndimor: ekspozimi i ndikimeve keqdashëse përmes gazetarisë mbikëqyrëse.”
