Connect with us

Hi, what are you looking for?

Debunking Articles

Lavrov përdor rastin e Kosovës për të akuzuar NATO-n, BE-në e OSBE-në

Foto: OSCE
*Përgatiti: Ridona Berisha

Më 30 nëntor dhe 1 dhjetor, në Shkup u mbajt takimi i OSBE-së i cili mblodhi ministrat e Punëve të Jashtme të 57 anëtarëve të kësaj organizate, me seli në Vjenë. Mes kundërshtimesh e polemikash, aty mori pjesë edhe ministri i Jashtëm i Rusisë, Sergey Lavrov. Samitin ku ishin pjesëmarrëse shtetet perëndimore, që i vunë sanksione Rusisë pas agresionit mbi Ukrainën, Lavrovi e shfrytëzoi për ta akuzuar BE-në, NATO-n e OSBE-në, se edhe ata ushtruan agresion ndaj një vendi të pavarur në vitin 1999, kur vendosën ta bombardojnë Serbinë. Po ashtu, riktheu deklaratat e njohura të zyrtarëve rusë se Kosova iu mor me dhunë Serbisë.

Deklaratat e ministrit të Jashtëm rus, Lavrov, janë transmetuar në mediat shqiptare.

Paralajmërimi se në takim do të ftohej edhe Lavrovi nxiti reagime të mëdha që fillimisht u transmetuan në shtetin që ishte nikoqir i takimit, Maqedonia e Veriut. Mediat maqedonase kanë shkruar se ministri i këtij shteti, Bujar Osmani, hyri në konflikt edhe me ministren e Mbrojtjes, Slavjanka Petrovska, vetëm që ta sillte në Shkup ministrin rus të Punëve të Jashtme, Sergey Lavrov.

Megjithëse fjalimi i Lavrovit u bojkotua nga shumica prej anëtarëve të OSBE-së, deklaratat e tij u shpërndanë gjerësisht edhe nga konferenca që ai e dha pas samitit.

Lavrov deklaroi se vendet e NATO-s dhe Bashkimit Evropian e kanë shkatërruar dimensionin ushtarako-politik të OSBE-së, duke shtuar se “në vitin 1999, NATO kreu agresion brutal kundër Jugosllavisë, një anëtare e OSBE-së dhe OKB-së. Dhe në vitin 2008, duke shkelur rezolutën 1244 të Këshillit të Sigurimit të OKB-së dhe parimin e paprekshmërisë së kufijve në Evropë nga akti final i Helsinkit, Serbisë iu mor Kosova pa asnjë referendum”.

Foto: Huzuar nga Rtrs.tv

Pas një viti, Akti Final i Helsinkit do t’i mbushë 50 vjet dhe sipas Lavrovit “në këtë drejtim, me keqardhje themi se OSBE-ja e mirëpret këtë përvjetor në një gjendje të dhimbshme dhe perspektivat e saj janë të paqarta“. Sipas tij, zgjerimi i NATO-s në Lindje është një nga faktorët që cenon sigurinë në Evropë.

Si rezultat i deklarimeve të Lavrovit, pati një përplasje mes Rusisë dhe Shqipërisë. Ministri i Jashtëm shqiptar, Igli Hasani, theksoi se Rusia po kërkon të nxisë telashe në rajonin e Ballkanit Perëndimor, duke dobësuar kështu edhe OSBE-në.

”Kërcënimi më i madh për sigurinë tonë sot, në të vërtetë për të gjithë arkitekturën tonë të sigurisë, duke përfshirë edhe këtë organizatë, është Rusia dhe lufta e saj e paligjshme e agresionit kundër Ukrainës”, tha Hasani.

Vizita e Lavrovit u transmetua gjerësisht edhe nga mediat serbe, të cilat e vunë theksin te deklaratat e tij lidhur me Kosovën.

Kësisoj, gazeta Blic ka shpërndarë një artikull me titull “Kaos në Shkup për deklaratat e Lavrovit që u poshtërua dhe u bojkotua, i cili përmendi edhe Kosovën (VIDEO)”. Po ashtu, ky medium shpërndau disa video nga Platforma “X”, në të cilat shihet se Lavrovi injorohet nga shumica e pjesëmarrësve, ku ndër përshëndetjet e vetme që pati ishte ajo me ministrin e Punëve të Jashtme të San Marinos, Luca Beccari.

Edhe mediat e tjera, si Sputnik, u dhanë hapësirë deklarimeve të Lavrovit, që kanë të bëjnë me marrëveshjet mes Kosovës dhe Serbisë. Aty merret në mbrojtje Serbia dhe akuzohet BE-ja se po i bën asaj presion për t’i vënë sanksione Rusisë. Mes të tjerash, në artikull shkruan se Lavrovi ka kritikuar Bashkimin Europian, “pasi po përdor shkopin vetëm ndaj Serbisë”.

Foto: Huazuar nga Sputnik

Artikulli me të njëjtën përmbajtje është shpërndarë edhe nga Politika.rs

Së fundmi u paralajmërua se Rusia ka për qëllim të hapë një konflikt të ri në Ballkanin Perëndimor. Presidenti ukrainas, Volodymyr Zelensky, në një takim me gazetarë nga Afrika, tha: “Kushtojini vëmendje Ballkanit. Më besoni, ne po marrim informacione. Rusia ka një plan të gjatë. [Së pari kemi pasur] Lindjen e Mesme – shpërqendrimi i dytë do të jetë Ballkani”.

Një rrezik të tillë më pas e konfirmuan edhe zyrtarë të Bashkimit Europian. Sekretari i Përgjithshëm i NATO-s, Jens Stoltenberg, i cili vizitoi Kosovën më 20 nëntor, është shprehur se: “Për një kohë të gjatë ne kemi thënë se Rusia po bën përpjekje për të ushtruar ndikim malinj edhe në rajonin e Ballkanit Perëndimor. Pra, po, ky është shqetësimi që ne e ndajmë dhe ky nuk është shqetësim i ri, por shqetësim që ka qenë me ne për një kohë. Ne në këtë pikë pajtohemi me presidentin e Ukrainës dhe e dimë që Rusia po bën gjithçka që mundet që të mbjellë pakënaqësi, jostabilitet politik, ndikim të huaj, manipulim informatash dhe tjera”, duke shtuar se pikërisht për këtë arsye BE-ja ka shtuar ndihmën për partnerët në vendet e Ballkanit Perëndimor që të përballen me këto kërcënime.

Në lidhje me këto paralajmërime, kryeministri i Kosovës, Albin Kurti, përmes një postimi ka deklaruar se Rusia, me qëllimin që të shpërqendrojë NATO-n, po synon të ndezë një vatër krize “në oborrin e Bashkimit Evropian“, ndërsa ka shtuar se po vërehet ”kërcënimi nga Rusia dhe Serbia për stabilitetin, paqen dhe sigurinë rajonale“.

Që nga fillimi i luftës mes Ukrainës dhe Rusisë, presidenti rus Vladimir Putin ka përdorur Kosovën me qëllim për ta goditur Perëndimin. E ka bërë këtë duke shpërndarë edhe dezinformata të shumta kinse në Ukrainë po luftojnë mercenarë nga Kosova. Këto pretendime janë mohuar nga institucionet e Kosovës.

*Ky artikull publikohet në kuadër të Iniciativës Rajonale të Ballkanit Perëndimor kundër dezinformimit. “Qendra kundër dezinformatave në Ballkanin Perëndimor: ekspozimi i ndikimeve keqdashëse përmes gazetarisë mbikëqyrëse.”

Lexoni Gjithashtu

Analizë

Viti i parë i Qeverisë Kurti shënoi një start të vështirë në politikën e jashtme, shoqëruar me shumë gabime diplomatike dhe dështime të protokollit....

Analizë

Katër ditë para Vitit të Ri, më 27 dhjetor 2023, Qeveria e Kosovës miratoi në heshtje Projektligjin për Komisionin e Pavarur për Media, i...

Disinfo

Gjatë dy viteve të fundit, Kosova ishte cak i sulmeve kibernetike dhe kërcënimeve me bomba, që kishin për qëllim destabilizimin e vendit dhe krijimin...

Analizë

Në epokën me hovin më të madh teknologjik, shtetet u kushtojnë rëndësi të veçantë prezencës së tyre digjitale në rrjetet sociale, si dhe kualitetit...

Copyright © 2024 Të gjitha të drejtat e rezervuara © Sbunker. Materialet e botuara në këtë faqe nuk mund të riprodhohen, shpërndahen, transmetohen, ruhen apo përdoren në mënyra tjera, pa leje paraprake nga Sbunker. Design & Hosting by: PROGON LLC.